31 мартта Өфөлә «Евразия» сауҙа үҙәге алдындағы (Затон биҫтәһе) майҙанынды «Науруз» — яҙғы көн менән төндөң тигеҙлеге байрамы уҙғарыла. Байрам көндөҙгө сәғәт 11-ҙә башлана.

Сараны ойоштороусылар — Башҡортостандың Мәҙәниәт министрлығы, Өфө хакимиәте, Республика халыҡтары ассамблеяһы, Халыҡтар дуҫлығы йорто һәм республиканың милли-мәҙәни йәмәғәт ойошмалары.

Ойоштороусылар хәбәр итеүенсә, сарала Өфөнөң милли мәҙәни үҙәктәренән, шулай уҡ Ғафури районының «Сәйетбаба» башҡорт тарихи-мәҙәни үҙәгенән һәм Бүздәк районының «Килем» татар тарихи-мәҙәни үҙәгенән 10-дан ашыу этнос вәкилдәре ҡатнашасаҡ.

Байрам ҡунаҡтары ҙур ҡаҙандарҙа бешкән былау, милли аш-һыу, ҡамыр ризыҡтары менән һыйланасаҡ.

Сәхнәлә төрлө милләтле артистар һәм ижади коллективтар сығыш яһай. Башҡортостанда йәшәгән халыҡтарҙың бөтә милли-мәҙәни берләшмәләре үҙҙәренең программаһын әҙерләй.

Башҡортостанда «Науруз» республика байрамы 2001 йылдан бирле үткәрелеп килә. Элекке йылдарҙа ул Салауат Юлаев майҙанында, Аксаков баҡсаһында, Яҡутов исемендәге паркта, Ҡашҡаҙан паркында уҙғарылды.