Башҡортостан Башлығы вазифаһын ваҡытлыса башҡарыусы Радий Хәбировтың тәҡдиме менән 2020 йыл Рәсәйҙә Халыҡ ижады йылы тип иғлан ителде. Рәсәй Федераль Йыйылышының Федерация Советы рәйесе Валентина Матвиенко «Рәсәй субъекты сәғәте» ултырышында ошо турала белдерҙе.

«Беҙ Башҡортостан Башлығы вазифаһын ваҡытлыса башҡарыусы Радий Хәбировтың 2020 йылды Халыҡ ижады йылы тип иғлан итеү тураһында тәҡдимен хупланыҡ. Был Бөтә донъя фольклориадаһы кеүек халыҡ-ара кимәлдәге ҙур сара менән тап килә. Фольклориада 2020 йылда Башҡортостанда ойошторола», — тип билдәләне Валентина Матвиенко.

2020 йылдың йәйендә Башҡортостанда Бөтә донъя фольклориадаһы уны уҙғарыу тарихында иң күләмлеһе булырға тейеш.

Фольклориада 2020 йылдың 18 июленән 1 авгусына тиклем уҙа. Унда Башҡортостандың барлыҡ ҡала-райондары ҡатнаша. Биш ҡитғанан вәкилдәр һәм 100-гә яҡын коллектив көтөлә. Бөгөнгә 73 илдән ғаризалар алынған. Уларҙың 53-ө республикаға килергә тейешле ижади коллективтарҙы билдәләгән дә инде.