Мәҙәниәт, сәнғәт һәм креатив индустрия өлкәһендәге проекттарҙы тормошҡа ашырыуға Беренсе президент гранттары конкурсына йомғаҡ яһалды. Конкурстың дөйөм бюджеты 3,5 миллиард һум тәшкил итә. Башҡортостанға 22 муниципаль берәмектән 39 еңеүсенән 27,7 миллион һум йәлеп ителгән.

2022 йылда отҡан гранттар һаны буйынса Башҡортостан Волга буйы федераль округында - өсөнсө, Рәсәйҙә алтынсы урын яуланы. Өфө (10 еңеүсе), Ғафури (5 еңеүсе), Сибай, Белорет ҡалаларынан, Ҡалтасы һәм Яңауыл райондарынан (2-шәр еңеүсе) ойошмалар иң ҙур һөҙөмтә күрһәткән.

- Беҙ Мәҙәни башланғыстар фонды булдырылыуына бик шатбыҙ. Төрлө ижади проекттарҙы тормошҡа ашырыуға аҡса алыу өсөн яҡшы мөмкинлектәр тыуҙы, - тип билдәләне Башҡортостан Республикаһы мәҙәниәт министрының беренсе урынбаҫары Наталья Лапшина. - Грант эшмәкәрлеге бөтә өлкәләрҙә үҫешә, һәм беҙҙең сәнғәт эшмәкәрҙәре, муниципалитеттарҙағы мәҙәниәт бүлектәре гранттар алыуға конкурстарҙа ҡатнашырға өйрәнә. Беҙҙә 39 еңеүсе, һәр проект үҙенсәлекле. Был конкурста беҙҙең заявкалар беренсе конкурсҡа ҡарағанда күберәк. Республикаға йәлеп ителәсәк дөйөм сумма 28 миллион һум самаһы тәшкил итте. Барлыҡ проекттарҙың да атамалары бик матур, сағыу, ҡояшлы. Уларҙың һәр береһенә уңыштар теләйбеҙ һәм бөтә муниципалитеттар, коммерцияға ҡарамаған ойошмалар, ижади союздар грант аҡсаһын йәлеп итеү буйынса әүҙем эшмәкәрлеген дауам итер тип ышанабыҙ.

2021-2022 йылдарҙа Башҡортостандан бөтәһе 749 ғариза тапшырылған, дөйөм суммаһы 52,9 миллион һумлыҡ 80 ғариза еңгән. Дөйөм йәлеп ителгән аҡса күләменең үҫеше 2,5 миллион һумға (10%) артҡан: 2021 йылда 25,2 миллион һумдан 2022 йылда 27,7 миллион һумға тиклем.