2016 йылдың 25-се октябренән алып декабрҙең 20-нә тиклем Х. Әхмәтов исемендәге Башҡорт дәүләт филармонияһында X Халыҡ-ара «Sauerfest» орган фестивале уҙасаҡ.

Өфөлөләргә Италия, Испания, Франция илдәренең, Мәскәү, Екатеринбург, Санкт-Петербург ҡалаларының орган сәнғәте оҫталары менән осрашыу бәхете тейәсәк.

«Sauerfest» орган фестивален рәсәй музыка тәнҡитсеһе, виолончелист Артем Варгафтик (Мәскәү) менән берлектә Свердловск дәүләт академия филармонияһы солисы, органист, клавесинист Тарас Багинц (Екатеринбург) алып барасаҡ.

Тамашасыларға «Бах и Мендельсон. Перезагрузка» программаһын тәҡдим итәсәктәр.

30 октябрь көнө Санкт-Петербург ҡалаһынан "Piligrim horn quartet" валторн квартетының килеүе көтөлә. "PiliGrim Horn Quartet “ репертуары бик бай, валторн квартет классикаһынан оригиналь әҫәрҙәр яңғыраясаҡ. Ансамблдә Станислав Авик, Мирон Кирилл, Павел Федоров, Никита Глагольев, Иван Васильев ҡатнашасаҡ.

Йәш музыканттар БДФ-ның органисы, БР-ның атҡаҙанған артисы Эльвира Хәйретдинова менән сығыш яһаясаҡтар.

10 ноябрь көнө Эльвира Хәйретдинова Мәскәү ҡалаһы гобоисы, халыҡ-ара конкурстар лауреаты Алексей Балашов менән дуэт башҡарасаҡ.

Башҡорт дәүләт филармонияһының матбуғат хеҙмәте хәбәр итеүенсә, 15 ноябрь көнө Италиянан М.Таривердиев исемендәге IX Халыҡ-ара органистар конкурсы лауреаты, органист Антонио ди Дедда килеүе көтөлә.

29 ноябрь билдәле мәскәү музыканты Марина Воинова барлыҡ теләүселәр өсөн концерт-әңгәмә үткәрергә йыйына.

3 декабрь көнө БДФ сәхнәһендә «Canto viva» ансамбленың сығышын ҡарай аласаҡһығыҙ.

11 декабрь көнө Париж ҡалаһынан Давид Кассан маэстроһы киләсәк.

 «SAUERFEST» халыҡ-ара фестивале 20 декабрь көнө испан музыканты Раул Родригестең сығышы менән тамамланасаҡ.

Иҫегеҙгә төшөрөп үтәйек, Беренсе орган фестивале 2002 йылда БР-ның халыҡ артисы, билдәле музыкант Владислав Мортазин инициативы буйынса уҙғарылғайны. Шул ваҡыттан алып был музыкаль проект төрлө исемдәр аҫтында әүҙем үткәрелеп килә.

Гүзәл Багаева