2 февралдә Хөсәйен Әхмәтов исемендәге Башҡорт дәүләт филармонияһында Башҡортостандың атҡаҙанған артисы Фәдис Ғәниевтең ижади юбилейына арналған кисә уҙа.

Бынан 35 йыл элек моңло тауышлы, шаян, йор һүҙле Фәдис Ғәниев Хөсәйен Әхмәтов исмендәге Башҡорт дәүләт филармонияһында хеҙмәт юлын башлай. Шул көндән алып ул тыуған республикаһына ысын ижадсы булараҡ илһамланып, дәртләнеп, ең һыҙғанып тоғро хеҙмәт итә. Йырға, сәхнәгә булған яуаплылығы, таланты, тырышлығы, ихласлығы менән ул ике туғандаш республикала һөйөү һәм хөрмәт яулаған йырсы, оҫта алып барыусы булып танылды.

Бер нисә быуын тамашасыларының яратҡан йырсыһы, ысын талант эйәһе Фәдис Ғәниевтең ижадына 35 йыл тулыуға арналған кисәлә сәхнәләш дуҫтары – Башҡортостандың халыҡ артисы Хәлит Фәтихов, Башҡортостандың халыҡ артисы, йырсының ҡатыны Лилиә Биктимерова, Башҡортостандың атҡаҙанған артисы, башҡорт һәм татар эстрадаһының популяр йырсыһы Гөлназ Асаева һәм башҡа артистар ҡатнаша.

Концерттың режиссеры — Башҡортостандың атҡаҙанған сәнғәт эшмәкәре Сулпан Асҡарова.

Билеттарҙы филармония кассаһында һәм сайтында алырға мөмкин.

«Пушкин картаһы» ғәмәлдә.

Киске сәғәт 6-ла башлана.

Йәш сикләүе — 16+/