Йәш журналист, Рәсәй һәм Башҡортостан яҙыусылар союзы ағзаһы, Рәсәй һәм Башҡортостан журналистар союзы ағзаһы, Ш.Бабич исемендәге дәүләт премияһы лауреаты, “Ҡалдырма, әсәй!” популяр китабы авторы Айгиз Баймөхәмәтовтың “Әкиәтһеҙ бала-саҡ” исемле яңы китабы донъя күрҙе. Китаптың тиражы 5000 экземпляр тәшкил итә.

Яңы китап -“Ҡалдырма мине, әсәй!” повесының, М.Ғафури исемендәге Башҡорт дәүләт академия драма театрында сәхнәләштерелгән “Хыялға ҡаршы” спектакленең дауамы. Ҙур полулярлыҡ һәм билдәлелек яулап өлгөргән китап кеүек, спектакл дә публика һөйөүен тиҙ яуланы, шулай уҡ сит республика театрҙарында ла ҙур уңыш менән сәхнәләштерелә.
“Әкиәтһеҙ бала-саҡ” – яңы тетрәткес хәл-ваҡиғалар менән тулы автобиографик әҫәр. Тәүге китапҡа инеп өлгөрмәгән төрлө ваҡиғалар, геройҙарҙың артабанғы яҙмышы, тетрәткес хәл-ваҡиғалар, һыҙланыуҙар...

Әҫәрҙә балалар йорто тәрбиәләнеүсеһе Ильяс исемле етем малайҙың еңел булмаған тормошо һүрәтләнә. Урлашыу кеүек насар ғәҙәт менән дә дуҫлашырға тура килә әҫәр геройына. Уҡыусылар Ильястың ни өсөн был юлға барыуын тиҙҙән донъя күрәсәк китапты ҡулдарына алғас ҡына аңларҙар.

“Әкиәтһеҙ бала-саҡ” китабы Мәскәү ҡалаһында рус телендә лә нәшер ителәсәк.

Айгиз Баймөхәмәтов менән ағымдағы йылдың март айында интервью ойошторолғайны. “Ҡалдырма, әсәй!” повесы, “Хыялға ҡаршы” спектакле һәм “Әкиәтһеҙ бала-саҡ” әҫәрҙәре тураһында ентекле мәғлүмәт алырға теләһегеҙ, түбәндәге һылтанма буйынса үтегеҙ (http://prpsk.ru/archives/4850)