Башҡорт кинорежиссёры Айнур Асҡаровтың «Өс таған» фильмы Мәскәүҙә үткән «Йәшәрбеҙ» кинофестивалендә бер юлы өс призға лайыҡ булды. «Тулы метражлы уйын киноһы» номинацияһында - икенсе урын, «Иң яҡшы актёр ансамбле» өсөн диплом һәм Мәскәү ҡала думаһынан бүләк.
«Йәшәрбеҙ» кинофестивале – Рәсәйҙең төп киносмотрҙарының береһе. Кинофестиваль барышында иң яҡшы төрлө жанрлы эштәр күрһәтелә. Программаға 31 фильм инде, уларҙың 11-е өсөн был премьера булды.
Фильмды Башҡортостан Республикаһы Хөкүмәте, Мәҙәниәт министрлығы, Әмир Абдразаҡов исемендәге «Башҡортостан» киностудияһы булышлығында «Асҡарфильм» студияһы төшөрҙө. Икенсе режиссер — Руслан Юлтаев, ҡуйыусы рәссам — Айгөл Байрамғолова, ҡуйыусы оператор— Вячеслав Ложковой, композитор — Камил Абдуллин, костюмдар буйынса рәссам — Әлиә Хансен, реквизит буйынса рәссам — Анастасия Андреева.
Мостай Кәримдең билдәле повесы буйынса төшөрөлгән фильм Рәсәйҙә прокатҡа сығырға әҙерләнә.