Өфөлә XXVI Халыҡ-ара Аксаков байрамы киң билдәләнә. Ошо дата айҡанлы саралар 29 сентябрҙә, рәссам Виктор Суздальцевтың оҫталыҡ дәресе һәм балалар өсөн «Ал сәскә» интерактив программаһы менән асылды, тип хәбәр итә Өфө ҡала Советының матбуғат хеҙмәте.

С.Т. Аксаковтың мемориаль музейында музыкаль кисә һәм М.И.Глинка исемендәге йәмғиәттең вице-президенты, пианист Владимир Рябчиков менән оҫталыҡ дәресе ойошторолдо. Төп саралар кисә, 30 сентябрҙә уҙҙы. М.В. Нестеров исемендәге Башҡорт дәүләт музейында «Абрамцево — С.Т. Аксаковтың Мәскәү янындағы имениеһы» темаһына түңәрәк өҫтәл уҙҙы. Мәскәү дәүләт һыу транспорты академияһы һәм 11-се гимназияла Аксаков дәрестәре үтте.

С. Т. Аксаковтың мемориаль музейында «…Тоғро дуҫ һәм тормош иптәше…» исемле фотокүргәҙмә асылды. Ул яҙыусының тыуыуына 225 йыл тулыуға бағышланған. Бынан һуң Софья аллеяһында халыҡ байрамдары ойошторолды. Сарала Өфө ҡала Советы депутаттары һәм башҡа төбәктәрҙән, сит илдәрҙән килгән ҡунаҡтар ҡатнашты.

Киске сәғәт 6-ла С.Т. Аксаков һәйкәленә сәскә һалыу ҡаралған. Байрамдың икенсе көнө Башҡорт дәүләт опера һәм балет театры алдында Аксаков балы үтте. 

Бөгөн байрам Бәләбәй, Ҡырмыҫҡалы һәм Өфө райондарында дауам итә. 

Арина Рәхимҡолова/«Башинформ» мәғлүмәт агентлығы