Быйыл ҡурайсы, йырсы, актер Ғата Сөләймәновтың тыуыуына 100 йыл тула. Ошо уңайҙан Республикала сәнғәт оҫтаһының иҫтәләгенә арналған бәйгеләр һәм кисәләр уҙғарыу ҡаралған. V «Туғанлыҡ» Халыҡ-ара төрки телле театрҙар фестивале сиктәрендә танылған ҡурайсы Ғата Сөләймәновтың тыуыуына 100 йыл тулыуға арналған сара үтәсәк. Педагог, актер һәм йырсы, БАССР-ҙың халыҡ артисы, РСФСР-ҙың атҡаҙанған артисы Ғата Сөләймәновтың хәтер кисәһе бөгөн 7 сентябрҙә, Башҡорт дәүләт опера һәм балет театры сәхнәһендә үтә. 

Ғата Сөләймәнов 1912 йылдың 15 июнендә Баймаҡ районы 1-се Төркмән ауылында донъяға килгән. Уны БАССР-ҙың атҡаҙанған һәм халыҡ артисы, РСФСР-ҙың атҡаҙанған мәҙәниәт хеҙмәткәре, Салауат Юлаев исемендәге республика премияһы лауреаты, республикала ҡурай буйынса беренсе профессиональ педагог булараҡ беләбеҙ.