“Ҡан-ҡәрҙәштәргә – китап”
Әҙәбиәт йылы уңайынан “Башҡортостан” гәзите уҡыусылар, зыялылар араһында “Ҡан-ҡәрҙәштәргә – китап” акцияһын ойоштора.
Хөрмәтле замандаштар, милләттәштәребеҙҙең күбеһе Башҡортостандан ситтә йәшәй. Республика нәшриәттәрендә сыҡҡан китаптар Рәсәй төбәктәренә барып етмәй, шуға күрә сит өлкәләрҙә йәшәгән халҡыбыҙ вәкилдәре туған телебеҙҙә аралашыуға һыуһап көн итә. “Башҡортса әҫәрҙәр уҡыһаҡ, ҡулыбыҙға туған телдә сыҡҡан китапты тотһаҡ, ҙур ҡыуаныс кисерәбеҙ! “Бәйләнештә” социаль селтәренең башҡортса интерфейсы беҙҙең рухи ынтылыштарыбыҙҙы бер ни тиклем ҡәнәғәтләндерә. Китаптар беҙгә лә килеп етһен ине!” – тип яҙа Марат исемле Силәбе өлкәһе егете.
Ә ошондай күңел кисерештәре менән уртаҡлашҡандар, аралашыуға һыуһағандар, ысынлап та, бихисап. Әйҙәгеҙ, ҡулыбыҙҙан килгән тиклем ситтә йәшәгән халҡыбыҙ вәкилдәренә ярҙам ҡулы һуҙайыҡ. Силәбе, Ырымбур, Һамар, Һарытау, Ҡурған өлкәләрендә, Пермь крайы һәм башҡа яҡтарҙа төпләнгән милләттәштәребеҙ башҡортса китап уҡып ҡыуанһын!
Ошоно иҫәпкә алып, “Башҡортостан” гәзите редакцияһы “Ҡан-ҡәрҙәштәргә – китап” акцияһын ойоштора. Моғайын, күптәрегеҙҙең йортонда бүләк итерлек, яңы йәки ҡат-ҡат уҡылған китаптар барҙыр. Уларҙағы рухи байлыҡ башҡаларға ла ҡыуаныс килтерһен ине. Башҡортостандың халыҡ шағиры Мостай Кәрим әйтмешләй, бүлешкәндән йыр-моң арта ғына.
Хөрмәтле дуҫтар, һеҙҙән рухи хазиналарыбыҙҙың сағылышы булған милли китаптар көтөп ҡалабыҙ! Тулыраҡ мәғлүмәтте 272-05-43, 272-16-24 телефондарына шылтыратып белә алаһығыҙ.
Ситтә йәшәгән милләттәштәребеҙгә ярҙам "Башҡортостан" гәзите редакцияһының 512-се бүлмәһендә ҡабул ителә.
