15-16 июнь Ейәнсура районының Ҡыҙылташ тип аталған яланда «Шоңҡар» журналы, «Юлдаш» мәғлүмәт һәм йыр-моң каналы менән берлектә гитарала уйнап-йырлаусыларҙың «Ҡош юлы» асыҡ конкурсы үтә. Конкурстың төп шарты – гитарала уйнап, башҡортса йырлау. 

Тәүге тапҡыр был конкурс 2012 йылдың йәйендә үтте. Ейәнсура районының Оло Һүрәм буйы үҙенсәлекле моңға сорналды. «Ҡош юлы»ның беренсе бәйгеһе 4 меңгә яҡын ҡатнашыусыны йәлеп итте. Сара республика, Рәсәй төбәктәрен генә түгел, Украина, Германия, Беларусь, Ҡаҙағстан илдәре һәүәҫкәрҙәрен дә берләштерҙе. «Бәйләнештә» сайтындағы махсус биткә ҡатнашыусыларҙың 174 видеояҙмаһы урынлаштырылды. Шуларҙың иң-иңдәрен тамашасылар үҙҙәре һайлап финалға үткәрҙе.

«Ҡош юлы» гитарала уйнап-йырлаусыларҙың конкурсы башҡорт йәштәренең яратҡан тамашаһына әүерелде. Ысынлап та, йәйге кистә усаҡ янында гитаранан ағылған илаһи моң күңелдәрҙе елкетә, илһамландыра, һағышландыра. Бында йыр-моңға ғашиҡ фекерҙәштәр йыйыла.