Халҡыңдың йыр-көйҙәрен сит тарафтарҙа ҡурай моңона сорнап яңғыратыу һәм, иң мөһиме, уларҙы башҡа милләт вәкилдәре күңеленә үтеп инә алырлыҡ һәм унда мәңгелеккә уйылып ҡалырлыҡ итеп башҡарыу бәхете бик һирәктәр өлөшөнә төшкән бәхет. Өфө урта махсус музыка колледжының 9-сы синыф уҡыусыһы Арыҫлан ОМОРҘАҠОВ та ошо көндәрҙә шундай бәхеткә өлгәште.

Арыҫлан күптән түгел Ҡаҙан ҡалаһында үткән академик һәм халыҡ музыкаһын йәш башҡарыусыларҙың IV Халыҡ-ара конкурсынан ҡайтты. Төрлө төбәктән йыйылған 400-ләп ҡатнашыусы араһында ул халыҡ инструменттарында яңғыҙ башҡарыусылар төркөмөнөң 15-17 йәшлектәр категорияһында ҡурайҙа башҡорт халыҡ йырҙары "Ғилмияза", "Аҡ яурын - сал бөркөт" һәм "Байыҡ"ты башҡарып, II дәрәжә лауреат исеменә лайыҡ булды. Ҡурайға бәләкәйҙән ғашиҡ Арыҫландың юлында һәр ваҡыт уның ынтылыштарын ҡеүәтләп-хуплап тороусы уҡытыусылар осрап тора, уға ҡурай серҙәренә төплө төшөнөргә ярҙам итә. Әбйәлил районы Асҡар музыка мәктәбенең Илһам Шакиров етәкләгән ҡурай класында шөғөлләнгән саҡта төрлө конкурс-бәйгеләрҙә призлы урындар яулай ул. Уңыштар эҙһеҙ үтмәй һәм 5-се кластан ул Өфөлә, билдәле ҡурайсы Роберт Юлдашев етәкселегендә уҡый башлай. Әлеге ваҡытта Венер Йылҡыбаевта белемен камиллаштырыуҙы дауам итә.

- Ҡурай теле аша ағылған моңдо тыңлаусыларға сайпылдырмай, тулы килеш алып барып еткереү өсөн үҙеңдең йөрәгең ошо моң менән тулы булырға тейеш. Ҡурай өҫтән генә уйнауҙы, моңдо өҙөп-йыртып башҡарыуҙы, ғөмүмән, ярты-йортолоҡто яратмай. Шуға күрә мөғжизәле һәм үҙенсәлекле ҡурай моңо менән һаҡ булырға, уны аңларға һәм күңелдең иң нескә хистәре аша үткәрә белергә кәрәк. Бары тик шул саҡта ғына иғтибарлы һәм ихтирамлы тыңлаусы табырға мөмкин. Быны һәр ваҡыт иҫемдә тотоуым тырышлыҡ, оҙайлы шөғөлләнеүҙәр, үҙ-үҙемә ышаныс менән берлектә миңә еңеүҙәр килтерәлер, тип уйлайым, - тип ололарса фекер йөрөтә Арыҫлан.

Әйткәндәй, ошо уҡ колледждың 1 курс студенты Элмира Әхмәтханованың да флейтала оҫта уйнауы жюри ағзаларының иғтибарынан ситтә ҡалманы. Ул III дәрәжә лауреат исеменә лайыҡ булды. 

Сығанаҡ: "Башҡортостан" гәзите