Башҡортостан Президенты Указына ярашлы, республикала совет дипломаты, күренекле йәмәғәт эшмәкәре Кәрим Хәкимовтың тыуыуына 125 йыл тулыуға арналған юбилей сараларын уҙғарыуға әҙерлек башланды.

Ул декабрҙә «Рәсәй һәм Көнсығыш илдәр: бәйләнештәр һәм хеҙмәттәшлек» тип исемләнгән халыҡ-ара ғилми-ғәмәли конференция үткәреүҙе, ғилми мәҡәләләр нигеҙендә йыйынтыҡ сығарыуҙы, Кәрим Хәкимовтың Бишбүләк районы Дүсән ауылындағы музейын төҙөкләндереүҙе, күсмә күргәҙмәләр ойоштороуҙы күҙ уңында тота. 

Кәрим Әбдрәүеф улы Хәкимов1892 йылдың 28 ноябрендә тыуа. Дипломат, Советтар Союзының Ғәрәп илдәрендәге беренсе тулы хоҡуҡлы вәкиле булып Совет Республикаһы менән ғәрәп-фарсы донъяһы араһында үҙ-ара мөнәсәбәт урынлаштырыуға тос өлөш индерә. Сәғүд дәүләтен тергеҙеүҙә ҡатнаша. Арҙаҡлы улын Башҡортостан онотмай. Ул әле лә халҡы хәтерендә - 1979 йылда билдәле йәмәғәт эшмәкәренә тыуған төйәге Бишбүләк районының Дүсән ауылында мемориаль музей асыла. 1982 йылда Мәжит Ғафури исемендәге Башҡорт дәүләт академия драма театрында «Ҡыҙыл паша» спектакле сәхнәләштерелә. Өфөлә, Ырымбурҙа, Ташкентта, Бохарала Кәрим Хәкимов исемен йөрөткән урамдар бар. 2011 йылдан Башҡортостанда Хәкимов уҡыуҙары үтә.

Сығанаҡ: БЮТ сайтынан