Ҡырғыҙ-Миәкә ауылының үҙәк район китапханаһында Башҡортостанда Милләт-ара татыулыҡты нығытыу йылына арналған «Дуҫлыҡ йондоҙлоғо» ижади кисәһе үтте.

Китапхана хеҙмәткәрҙәре һәм ҡунаҡтар театрлаштырылған тамаша формаһында сағыу милли костюмдарҙа республикала йәшәүсе төрлө халыҡтар исеменән сығыш яһаны, уларҙың көн-күреше һәм йолалары менән таныштырҙы, төрлө телдәрҙә йырҙар йырланы һәм шиғырҙар уҡыны.

Ҡунаҡтар халыҡ уйындарында, конкурстарҙа ҡатнашты, викторина һорауҙарына яуап бирҙе һәм «Дуҫлыҡ бейеүе»н рәхәтләнеп бейене.

Китапхана хеҙмәткәрҙәре байрамға ныҡлы әҙерләнгән: сарала «Китапхана – мәҙәниәттәр һәм телдәр мозаикаһы» стенды, «Беҙ дуҫлыҡ менән көслө» китаптар күргәҙмәһе ойошторолдо, китап уҡыусыларҙың ижади эштәре тәҡдим ителде, тип хәбәр иттеләр Миәкә районы хакимиәтенең мәғлүмәт-аналитика бүлегенән.

Автор: Тимур Рәхмәтуллин

«Башинформ»