Әбйәлил районы үҙәгендә БАССР-ҙың атҡаҙанған йырсыһы Бибикамал Мәһәҙиеваның тыуыуына 100 йыл тулыуға арналған башҡорт халыҡ йырҙарын башҡарыусылар конкурсы үтте.

БАССР-ҙың атҡаҙанған артисы Бибикамал Мәһәҙиеваның тыуыуына 100 йыл тулыуға арналған башҡорт халыҡ йырҙарын башҡарыусылар араһындағы конкурс төбәктә тәүге тапҡыр уҙғарылды. Шуға ҡарамаҫтан, музыкаль бәйге Әбйәлил, Баймаҡ, Ейәнсура, Учалы райондарынан һәм Сибай ҡалаһынан 50-гә яҡын конкурсантты бергә йыйҙы.

Башҡорт халыҡ йыраусыларын үҫтереү, милли фольклорға йәш быуынды йәлеп итеүҙе маҡсат итеп ҡуйған конкурс үҙ маҡсатына иреште. Жюри ағзалары быға тиклем ишетелмәгән, таныш булмаған йырҙарҙы бәйге сиктәрендә генә танышырға тура килде, тип билдәләне.

16 йәшкә тиклемге ҡатнашыусылар араһында Гран-приҙы Асҡарҙың 1-се мәктәбе уҡыусыһы Индира Шаһимәрҙәнова яулаһа, оло йәштәге йыраусылар араһында үҙенсәлекле тауыш эйәһе, тип Баймаҡ районынан Фәттәх Аралбаев танылды. Конкурс еңеүселәре ҡиммәтле бүләктәр, Маҡтау ҡағыҙҙары менән тәбрикләнде.

Сығанаҡ: БЮТ сайтынан