«Йәйғор» тип аталған экспозиция авторы Алина Камалетдинова быға тиклем бер тапҡыр ҙа ҡулына ҡәләм тотмаған. Әммә ҡыҙҙың һүрәттәре бер кемде лә битараф ҡалдырмай.

Ҡәләмде аяҡ бармаҡтары менән ҡыҫып тотоу, һүрәт төшөрөү - һәр хәрәкәт ҡыҙға ҙур ҡыйынлыҡ менән бирелә. Әммә Алина ауырлыҡтар менән көрәшергә күнеккән. Ул бирешергә уйламай. Һүрәттәре өҫтөндә ҡыҙ бер нисә аҙна, хатта айҙар эшләй.

Музей Алинаның һүрәттәрен күргәҙмәгә ҡабул итергә әҙерлеген белдергәс, ҡыҙ баҙап ҡала. Ай буйына эшкә тотона алмай. Ниһайәт, иң яҡын кешеләре - атаһы һәм әсәһе ярҙамы менән күргәҙмә асыла. Унда Алинаның хыялдары, тормошҡа мөнәсәбәте асыҡ төҫтәр аша сағылдырылған. Физик мөмкинлектәре сикләнгән булыу сәбәпле, ҡыҙ сәйәхәт итә алмай, тик һүрәттәрендә генә сихри донъя киңлектәрен иңләй.

Ғәҙәти булмаған экспозиция менән танышырға Туймазы халҡы музейға йыйылды. Тормош һынауҙары, ауырыуы менән ҡыйыу көрәшкән ҡыҙ тамашасыларҙа һоҡланыу тойғоһо уятты.

Алина Камалетдинованың ата-әсәһе лә хөрмәткә лайыҡ, тип билдәләне туймазылар. Заманында ҡыҙҙарын балалар йортона бирергә лә кәңәш итәләр уларға. Әммә Камалетдиновтар тормош һынауын үтә: ҡыҙҙарына йәшәргә, ижад итергә ҡанат ҡуя.

Сығанаҡ: Башҡортостан юлдаш телевидениеһы