Шаран районының тарихи-тыуған яҡты өйрәнеү музейында үҙенсәлекле проект тормошҡа ашырыла башланы. 

Бөйөк Еңеүҙең 70 йыллығы алдынан музей хеҙмәткәрҙәре район мәктәптәренә һуғыш раритеттары һалынған һандыҡтар менән юллана. Уның эсенә өс мөйөшлө һалдат хаттары, ваҡыт үтеү менән йоҡарған хәрби каскалар, һуғышта ҡулланылған һауыт-һаба, яугирҙарҙың наградалары һалынған. Музей хеҙмәткәрҙәре фекеренсә, йәш быуын данлыҡлы тарихҡа үҙ ҡулдары менән ҡағылып ҡарарға тейеш. Шуға күрә музей витриналарында йылдар буйы туҙанланып ятҡан экспонаттар осоро артта ҡала, балалар һәм үҫмерҙәр менән яҡындан аралашыу тәжрибәһе алға сыға. Тарихи ҡомартҡылар һалынған сумаҙанды тәүгеләрҙән булып Мичурин ауылының балалар һәм үҫмерҙәр социаль приютында тәрбиәләнеүселәр асып ҡараны. Еңеү көнөнә тиклем һандыҡ эсендәге музей тотош районды урап сығасаҡ.