Сибай ҡалаһының Тарих һәм тыуған яҡты өйрәнеү музейында «Һуғыш беренсе биттәрҙә» тип аталған күргәҙмә асылды. Уны республика Хәрби Дан музейы менән «Комсомольская правда» газетаһы ойошторҙо. Күргәҙмә 1941 - 1945 йылдарҙа «Комсомольская правда» газетаһында баҫылып сыҡҡан мәҡәләләрҙе үҙ эсенә ала.

Һуғыштың икенсе көнөнә үк матбуғат баҫмалары үҙ хәбәрселәрен фронтҡа ебәрә. Хәрби журналистар совет халҡында илбаҫарҙарға ҡарата нәфрәт уятырға булышлыҡ итә. Улар совет ғәскәрҙәренең батырлығын күрһәтеү өсөн үҙ ғүмерҙәрен дә аямай. 4 йыл эсендә фронтта мең ярым хәбәрсе һәләк булған. «Һуғыш беренсе биттәрҙә» күргәҙмәһе хәрби журналистарҙың фиҙаҡәр хеҙмәтен күреү мөмкинлеген бирә. Фронт яңылыҡтары, шиғырҙар, фотолар, информбюро мәғлүмәттәре һәм хәрби лозунгтар яу йылдарының бөтә ысынбарлығын сағылдыра.

Бөйөк Ватан һуғышы йылдарында баҫылған 50 газетанан торған күргәҙмә Рәсәйҙең егерменән ашыу ҡалаһын урап сыҡҡан. Ойоштороусыларҙың әйтеүенсә, ул айырыуса ветерандар өсөн ҡәҙерле. «Һуғыш беренсе биттәрҙә» күргәҙмәһе апрель аҙағына тиклем Сибай ҡалаһында буласаҡ. Унда һәр кем фронттағы һуңғы хәбәрҙәр, хаттар, килешеүҙәр һәм бойороҡтар тураһында уҡып белә ала.

Сығанаҡ: Башҡортостан юлдаш телевидениеһы