Һуғыш еле «Башҡортостан» гәзитен дә ситләп үтмәй. Абруйлы матбуғат баҫмаһының 50 журналисы ҡәләмдәрен ҡоралға алмаштырып фронт һыҙығына юллана. Күргәҙмәгә ошо яу ҡаһармандарының фотоһүрәттәре ҡуйылған. Журналист-яугирҙар дошман илбаҫарҙарын ҡыйратыу менән бер рәттән гәзиткә мәҡәләләр ҙә ебәреп, халыҡтың Еңеүгә булған өмөтөн арттырып тора. Ойоштороусылар әйтеүенсә, фронтовик журналистар йәш быуын өсөн тыуған илгә һөйөү, ҡыйыулыҡ өлгөһө булып тора һәм уларҙың яҡты иҫтәлеген быуындан-быуынға тапшырыу изге бурыс. 

Күргәҙмәлә фронтовик журналистарҙың фотоһүрәттәре менән бер рәттән гәзиттең «Ҡанлы йылъяҙма» рубрикаһында ҡатнашыусыларҙың эштәре лә ҡуйылған. Тарихи датаға аранлған конкурс йыл башында иғлан ителә. Редакцияға республиканың төрлө төбәктәренән хаттар килә, уҡыусылар һуғыш михнәтен үҙ иңендә кисергән яҡындары хаҡында яҙа. Иң яҡшы туғыҙ материал күргәҙмәлә урын алған.