1 февралдә «Һылыуҡай-2012» республика телевизион конкурсы финалистары билдәле буласаҡ. Һылыуҡайҙар «Башҡортостан» телерадиокомпанияһында һайлап алыу туры йомғаҡтары аша билдәләнәсәк. 

Иҫегеҙгә төшөрәбеҙ, конкурсҡа район һәм ҡалаларҙа үткән, 16-22 йәштәрҙәге «Һылыуҡай» конкурсы еңеүселәре саҡырылды.  Улар шулай уҡ, башҡорт телен, халыҡтың ғөрөф-ғәҙәттәрен, йолаларын белергә тейеш. Ҡыҙҙарҙың буйы 170 сантиметрҙан түбән булырға тейеш түгел. Һәр ҡатнашыусы визитка, ижади конкурс (башҡорт бейеүе, таҡмаҡ, актерлыҡ оҫталығы буйынса коллоквиум), кейемдәр демонстрациялау, портфолио әҙерләргә тейеш.

Ойоштороусылар әйтеүенсә, «Һылыуҡай-2012» финалы 7 мартта, Өфөнөң «Нефтсе» Мәҙәниәт һарайында үтәсәк. Конкурстың һайлап алыу турын үткән ҡыҙҙар өсөн Өфөлә вокал, хореография, дефиле, сәхнә телмәре буйынса иң яҡшы уҡытыусылар менән ике аҙналыҡ әҙерлек курстары ойоштороласаҡ . 

«Башҡортостандың мәҙәни донъяһы» порталы