Башҡортостандың атҡаҙанған рәссамы, Мифтахетдин Аҡмулла исемендәге премия лауреаты, танылған һынлы сәнғәт оҫтаһы Риф Абдуллин бөгөн үҙенең ижад мастерскойында Өфө сәнғәт училищеһы студенттары менән осрашты. Унда танылған рәссамдың утыҙ йылдан артыҡ ижад дауамында яҙылған картиналары һаҡлана. 

Риф Абдуллин ижады башҡорт рәссамдары араһында айырым бер урынды биләй. Ул үҙенең илһамлы ижад емештәре менән Башҡортостанда ғына түгел, ә бөтә Рәсәйгә һәм сит илдәргә лә билдәле. Рәссам күберәк тәбиғәт күренештәрен, пейзаждар яҙырға ярата. Йылда йыраҡ Италия, Франция илдәренә барып шул төбәктең пейзажын төшөрөп ҡайтырға ғәҙәтләнгән.