Мәжит Ғафури исемендәге Башҡорт академия драма театрының Бәләкәй сәхнәһендә «Һүҙ – илһам ул, ул – илаһи...» тип аталған шиғриәт кисәһе үтте. Был сара актерҙар өсөн даими алып барылған «сәхнә теле» дәрестәре сиктәрендә ойошторолдо, идея авторы – Рәсәйҙең һәм Башҡортостандың халыҡ артисы Хөрмәтулла Үтәшев.

Был кисә сәхнәлә һөйләү оҫталығына, башҡорт әҙәби теленә иғтибарҙы арттырыу, һүҙгә ихтирам, туған телгә мөхәббәт тәрбиәләү маҡсатында ойошторолдо һәм ҡуйылған маҡсаттарға өлгәште. Һүҙ мәжлесенә яҙыусылар, драматургтар, шағирҙар, журналистарҙың килеүе лә сараның әһәмиәтен бермә-бер арттырҙы. 

Әҙәбиәт байрамында Хөрмәтулла Үтәшев, Нурия Ирсаева кеүек сәхнә оҫталары менән бер рәттән Гөлмирә Исмәғилева, Артур Кәбиров, Рәзифә Динмөхәмәтова, Юнир Ҡоланбаев, Ирада Фазлаева, Илфат Булатов, Фирғәт Ғарипов, Руслан Хайсаров, Урал Әминов, Айнур Ситдыҡов, Лилиә Ғалина, Фәнис Рәхмәтов, Юлиә Ғәләүетдинова, Зилиә Хәлилова кеүек йәш быуын артистары лайыҡлы сығыш яһаны. Артистар Дауыт Юлтый, Шәриф Биҡҡол, Батыр Вәлит, Рәғиҙә Янбулатова, Константин Симонов, Рәми Ғарипов, Мостай Кәрим, Зәйнәб Биишева, Ғайса Хөсәйенов кеүек яҙыусыларыбыҙҙың шиғырҙарын, парсаларын, хикәйәләрен һөйләп ишеттерҙе. Ниндәй генә әҫәрҙәр яңғыраманы был кисәлә – тамашасы Хөрмәтулла Үтәшев башҡарыуында «Башҡорт хәле»н (Д.Юлтый), Рәзифә Динмөхәмәтованың «Ҡыр ҡаҙҙары» (Р.Янбулатова), «Әсә» (Б.Вәлит) шиғырҙарын тыңлап тетрәнһә, Артур Кәбировтың «Абау, атаҡайым» (Ш.Биҡҡол), Урал Әминовтың «Ир монологы» (Р.Мифтахов), Илфат Булатовтың «Һарыбай менән Гальдемар» (Аманулла) кеүек шиғырҙарын тыңлап рәхәтләнеп көлдө. Йәштәрҙән айырыуса Гөлмирә Исмәғилева менән Лилиә Ғалинаның сығыштарын билдәләп үтке килә. Гөлмирә һөйләүендә «Ҡаһарман кантон» (Ғ.Хөсәйенов) парсаһы күңелдәрҙә халҡыбыҙ өсөн ғорурланыу тойғоһо тыуҙырһа, Лилиәнең«Үгәй атай» (А.Ҡәҙерғолов) хикәйәһе Бөйөк Ватан һуғышының әсе һағыштарын иҫләтеп күҙҙәрҙә йәш төйөлдөрҙө.

Әҙәбиәт байрамы шиғриәткә һыуһаған күңелдәргә май булып яғылды.