Әхәт Салих улы 1931 йылдың 9 ғинуарында Шишмә районында тыуған. Хеҙмәт биографияһын 1951 йылда Өфө сәнғәт училищеһын тамамлағас башлай. 1952 йылда БАССР-ҙың атҡаҙанған артисы Г.Латыпов менән «Кәтүк-Бағанай» юмористик дуэт төҙөйҙәр. Ҡадир Даян, Шәриф Биҡҡол, Мостай Кәрим һ.б. сатирик әҫәрҙәре, шулай уҡ лирик һәм публицистик монологтары менән тамашасы һөйөүен яулайҙар. Был дуэт гастролдәр менән Советтар Союзының бөтә төбәктәрен урап сыға.

Филармонияла эшләү дәүерендә Әхәт Уразмәтов сәхнәлә бөгөнгө көндә лә тиңе булмаған уникаль сатирик образдар тыуҙырырға ирешә, оҙаҡ йылдар буйына филармония составында бригада етәксеһе булып та эшләй. 

Башҡорт сәнғәтен үҫтереүгә тос өлөш индергән шәхес хаҡында иҫтәлектәр күңелдәрҙә оҙаҡ һаҡланыр.