18 май төнөнән 19 май көнөнә ҡараған көндә баш ҡалабыҙҙа сағыу ваҡиға – «Музей төнө» уҙасаҡ. Был төндә ҡала музейҙары 18.00 сәғәттән эшләйәсәк һәм Өфө халҡы таңға тиклем улар менән яҡындан таныша аласаҡ. Акция сиктәрендә төрлө күргәҙмәләр, экскурсиялар, йәрминкәләр, мастер-кластар һәм аң ҡеүәһен үҫтереүгә йүнәлтелгән уйындар ҡаралған.

БР-ҙың Милли музейы иртәнге 06.00 сәғәткә тиклем эшләй. «Кеше тәбиғәттә», «Рәссамдар һуғыш хаҡында» уйындары, «Ҡала оҫталары» күргәҙмәһе үтәсәк. Инеү хаҡы – 50 һум. Ете йәшкә тиклемге балаларға бушлай.

Республика хәрби дан музейы иртәнге 04.00 сәғәткә тиклем эшләй. Хәрби-тарихи майҙансыҡтар эшләйәсәк, һуғыш ҡорамалдары күргәҙмәһе, спецназ сығыштары, балалар уйындары, төрлө конкурстар, һәүәҫкәр артистар сығыштары көтөлә. Шулай уҡ Бөйөк Ватан һуғышында һәләк булыусы йәки хәбәрһеҙ юғалыусыларҙы эҙләгәндәргә «Тере хәтер» акцияһы дауам итәсәк.

«Музей төнөндә» М.Ғафуриҙың мемориаль йорт музейы ла ҡатнаша. Тамашасыларҙы яҙыусылар, артистар ҡатнашлығындағы музыкаль-әҙәби кисә көтә. Яҙыусының ижади мираҫы, тормошо менән ҡыҙыҡһыныусылар, рәхим итегеҙ!

«Мираҫ» галереяһы ла был төндә үҙ ишектәрен аса. Рәссам Игорь Тонконогийҙың шәхси күргәҙмәһе тамашасы күңеленә хуш килер тип ышанабыҙ. Сарала рәссамдың сығышы ла көтөлә. Инеү хаҡы бушлай.