Республикала II асыҡ кинематография сәнғәте фестивале тамамланды. Рәсәй кимәлендә ойошторолған конкурста көнүҙәк социаль проблемаларҙы яҡтыртҡан нәфис фильмдар ҡатнашты.

Йыр, бейеү, уйын-көлкө һәм, әлбиттә, кино. Йәш режиссерҙарҙың эшен Мәскәү режиссеры Олег Фомин, актерҙар Александр Песков, Аристарх Венес баһаланы. Ә конкурста ҡатнашыусылар иңенә мөһим бурыс йөкмәтелгән - тамашасыға донъяны яҡшы яҡҡа үҙгәртерлек картина тәҡдим итеү.

Халыҡ киноһы фестивале - һәүәҫкәр һәм профессиональ кинематографтарҙы бәйләүсе, бергә туплаусы ижад майҙаны. Конкурс академик кинематография талаптарынан сығып баһалауҙы күҙ уңында тотмай.

Фестивалгә Рәсәйҙең 16 төбәгенән һәм Украина, Белоруссия, Ҡаҙағстан илдәренән 91 картина тәҡдим ителгән. Жюри ағзалары фекеренсә, конкурсҡа уларҙың иң-иңдәре - дүрт тиҫтәһе һайлап алынған. Кино оҫталары уларҙы, ысынлап та, донъяны үҙгәртерлек фильмдар, тип билдәләй. Быйыл баһалама ағзалары Гүзәл Үзбәкованың «Кәрәкле һүҙ» тип исемләнгән киноһын иң лайыҡлыһы тип тапты. Әйткәндәй, бөгөндән һеҙ үҙегеҙ ҙә фильм авторы була алаһығыҙ, сөнки халыҡ киноһы сәнғәте бер ваҡытта ла актуаллеген юғалтмаясаҡ.