Әлбиттә, “Их, ҡасан беҙҙекеләр шулай…” – тип, заманында чарттарҙың беренсе баҫҡыстарынан төшә белмәгән йырҙары менән дан тотҡан “Модерн толкинг”тың кимәле хаҡында хыял итеү урынһыҙҙыр ҙа. Әммә был турала ла уйланырға кәрәктер тигәнем. 

Шишәмбе көнө гүзәл баш ҡалабыҙға хәҙер инде айырым йырсы рәүешендә илдәр буйлап турнеларында меңәрләгән тамашасы туплаусы Томас Андерс килеп ҡайтты. Уны кем саҡырҙы тиһәгеҙ, ғорурланып китеп әйтмәй булмай – беҙҙең блоггерҙарыбыҙҙың береһе булған, “ShawShow Entertainment”тың етәксеһе Заһир Ҡотлосурин һәм уның командаһы. Афарин егеттәр! 

“Өфө уттары” күңел асыу комплексы иһә, алдамай ғына әйтәм, шығырым тулы булды. Ҡыҫҡаһы, яҡынса 1400 кеше самаһы был кистә яратҡан йырсыһын тыңларға килгән ине. 

Ҡыҙыҡтыр ҙа, кәрәктер ҙә. Сөнки шуға ла кумирҙар, тигәндәй, һәр артистың үҙенә генә хас үҙенсәлектәре бар. Берәүҙәр гримеркала төрлөлөгөнән ташып торған спиртлы эсемлектәргә баҫым яһаһа, икенселәре – ризыҡҡа йә башҡа шарттарға. Томас та, мәҫәлән, Өфөгә килеренән алда уҡ осасаҡ рейсы Рәсәйҙә етештерелгән самолеттарҙа башҡарылһа – ултырмаясағын белдерҙе. Ҡыҫҡаһы, ышанмай ул Рәсәй самолеттарының хәүефһеҙлегенә. 

Концерт программаһы ла, ғәҙәттәгенән, байыраҡ булды. Айырыуса, сәхнәгә ағалы-ҡустылылар Эдгард һәм Аскольд Запашныйҙар оҙатыуында кескәй генә аҡ юлбарыҫтың сығып ятыуы һәм Томас Андерстың фатихаһынан Томас ҡушаматын алыуы ла шәп күренеш булды. Эйе, берәү булһа ҡаршы килер ине, әммә нисек шундай һирәк осрай торған йән эйәһенә исемеңде йәлләйһең инде? 

Томас Андерс, ғөмүмән, “Модерн толкинг”тың репертуары бик бай. Был көндө ул халыҡ тарафынан иң яратылған композициялар - «You`re My Heart, You`re My Soul», «Cheri Cheri Lady», «Brother Louie», «Geronimo`s Cadillac», «Win The Race», «Ready For The Victory», «You Are Not Alone» һәм башҡаларын башҡарҙы.

Сығанаҡ: «Шоңҡар» журналы