Кисә, 13-сө ғинуарҙа Х. Әхмәтов исемендәге Башҡорт дәүләт филармонияһының ҙур залында «Болливудҡа билет» исемле концерт үтте. Был концертты Һиндостандың Рәсәйҙәге вәкиллеге һәм шул илдең мәҙәни бәйләнештәр буйынса советы “Феррис уил энтертэйнмент” компанияһы менән берлектә
Башҡортостан Республикаһының Мәҙәниәт министрлығы ойошторҙо.
Артистарҙы тәбрикләү һүҙендә Башҡортостан Республикаһының мәҙәниәт министры Ә.И. Шәфикова алыҫтан килгән ҡунаҡтарға башҡорт балы һәм сувенирҙар тапшырҙы. «Был концерт беҙгә беҙҙең бала сағыбыҙҙы иҫкә төшөрҙө. Башҡортостандың Өфө ҡалаһын был Рәсәй кимәлендә үткән турҙа беренсе концерт майҙаны итеп һайлауығыҙ һәм шундай ҡыҙыҡлы, күңелгә ятышлы йыр-моң, дәртле бейеүҙәрегеҙ өсөн һеҙгә ҙур рәхмәт», - тине мәҙәниәт министры.
АҠШ-ғы һымаҡ Һиндостанда ла үҙенең Болливуды бар, был айырма тик бер хәрефтә генә тора. Советтар Союзы ваҡытында, бөтә халыҡ Һинд киноһын алып килгәндәр тип, клуб-кинотеатрҙарҙы шығырым тултыра торған филмдар нәҡ ошо Болливудта тыуа ла инде.
Үҙенсәлекле программаның режиссеры — Шубхра Бхардвадж. Уның егерме йылдан ашыу шундай ҙур концерттар ойоштороу тәжрибәһе бар. Был тамаша Америкала, Суданда, Ҡытайҙа, Японияла һәм башҡа илдәрҙә күрһәтелгән.
Концерт программаһы, Һинд артистары тамашасыларҙы сәхнәгә саҡырып, бергәләп дәртле йыр-моң һәм бейеү менән тамамланды. «Башҡортостандың мәҙәни донъяһы» порталы