4 март «Родина» кинотеатрында Халыҡ-ара ҡатын-ҡыҙҙар көнөнә ҡарата БР Мәҙәниәт министрлығы, «Башҡортостан» киностудияһы һәм Башҡортостандың Кинематографистар союзы менән берлектә «Башҡорт киноһы төнө» уҙҙы.

БР Мәҙәниәт министры урынбаҫары Р.Р.Алтынбаев министр А.И.Шафиҡова исеменән сараға йыйылыусыларҙы тәбрикләне.

Кисә кинематография өлкәһенә тос өлөш индереүселәрҙе тәбрикләүҙән башланды. Билдәле артистар Г.Мөбәрәкова, Н.Ирсаева, Т.Бабичева, Р.Бабич, сценарист, режиссер А.Вәлиева, звукорежиссер П.Абдулбанеева, режиссер-документалист Л.Мамина һәм В.Иҫәндәүләтова, «Родина» кинотеатры директоры Т.Разина, ойоштороусы Л.Ризванова, режиссер һәм сценарист Т.Бураҡаева, анимация режиссеры Е.Юшкова, рәссам А.Байрамғолова, кинодраматург З.Бураҡаева Башҡортостан Кинематографистар союзы әҙерләгән иҫтәлекле бүләк менән бүләкләнделәр.

Был «төндө» йәш режиссер Р.Пожидаев «Карусель» ҡыҫҡа метражлы фильмын тамашасы хөкөмөнә сығарҙы. Төп ролдәрҙе Р.Заһитов, Ф.Ғарипов, И.Ғилманова башҡарҙы. Шулай уҡ «Головоломка» (реж. А.Йомағолов), «Две далекие-близкие зимы» (реж.И.Исламғолов), «Таныш булмаған таныштар» (реж. А.Хужәхмәтов), «Ай тотолған төндә» (реж. Б.Халзанов), «Возвращение чувств» (реж. М.Осипьян) фильмдары күрһәтелде.