Баш ҡала беренсе тапҡыр «Театраль артылыш» тип исемләнгән уникаль проектта ҡатнашты. 18 көн эсендә Өфө тамашасыһына Силәбе, Төмән, Кемерово, Новокузнецк һәм Томск театрҙары 30-ҙан ашыу спектакль күрһәтте. Проект барышында барыһы 70 меңләп тамашасы театрға килгән. Иҫегеҙгә төшөрәбеҙ, Рәсәй Федерацияһының Мәҙәниәт министрлығы ойошторған проектта 1 спектакль тик бер генә тапҡыр уйналды.

Бөгөн Рус дәүләт драма театры бинаһында был уникаль проекттың пресс-конференцияһы үтте. Конференцияға Рәсәй театрҙары директорҙары йыйылды. «Театраль артылыш»тың ниндәй кимәлдә үтеүе, проблемалары, киләсәккә пландар тикшерелде. 

Өфөлә сығыш яһаусы театрҙар директорҙары, беҙҙең тамашасынан бик ҡәнәғәт булыуы, бында мәҙәниәт яратҡан, аңлаған халыҡ йәшәүе тураһында әйтеп үтте.

Проект етәксеһе Медный Сергей Анатольевич әйтеүенсә, «Театраль артылыш» киләһе йылдарҙа ла дауам итәсәк. Тамашаларҙың сифатын күтәреү, проекттың географияһын киңәйтеү күберәк кешене йәлеп итеү мөмкинлеген асасаҡ. 

"Башҡортостандың мәҙәни донъяһы" порталы