Экспозицияла Ырымбур шәле комбинатының баш рәссамы Рима Яҡупованың дебет шәлдәре тәҡдим ителә. Был төбәк менән Ейәнсура районының шәл оҫталары күптән тығыҙ хеҙмәттәшлек итә.
Ейәнсура районы элек-электән үҙенең шәлдәре менән дан тота. Төбәктә йәшәүсе халыҡ ошо маҡсатта күпләп кәзә, һарыҡ үрсетә. Төрлө биҙәкле шәл бәйләй. Был уларҙың төп кәсептәренең береһенә әйләнгән.
Күргәҙмәлә шәлдәрҙең ниндәйе генә юҡ! Һәр береһе күҙ яуын алырлыҡ. Бигерәк тә оҫтабикәнең Карауанһарай тип яҙылған эше уңышлы, ти белгестәр. Улар әйтеүенсә, нәҙек итеп иләнгән йөнгә ебәк ептең ҡушылып бәйләнеүе дебет шәлдең ҡулланыу ваҡытын оҙайта. Ә бына шәлдең балдаҡ аша еңел үтеүе уның сифатын билдәләй.
Халыҡ үҙ оҫталығын быуындан-быуынға тапшырып килә. Бынан тыш, күрше өлкәләр менән дә бәйләнеш өҙөлмәй. Әле күргәҙмәгә эленгән 30-ҙан ашыу дебет шәл тиҙҙән һатыуға сығарыласаҡ. Сығанаҡ: Башҡортостан юлдаш телевидениеһы