Бына нисәмә тиҫтә йыл рәттән Х.Әхмәтов исемендәге Башҡорт дәүләт филармонияһы сағыу концерттары, ҡыҙыҡлы кисәләре менән сәнғәт һөйөүселәрен ҡыуандыра. Һәр концертты тамашасылар ҙур түҙемһеҙлек менән көтөп ала, тиһәк берҙә хата булмаҫ. Көтөп алмаҫлыҡмы ни! Һәр көн тиерлек зәңгәр экрандарҙа балҡыған билдәле сәхнә йондоҙҙарын ҡул һуҙымы араһында ҡасан күрерһең дә, сихри моңона сорналырһың! Тап шундай сағыу йондоҙҙар балҡышын 1октябрь филармонияның ҙур залында осратырға була. Сөнки был көндө филармония 74-се концерт миҙгелен аса. Концертта халыҡ араһында киң танылыу яулаған Нәзифә Ҡадырова, Фәдис Ғәниев, Римма Амангильдина, Радик Вәлмөхәмәтов, Азамат Тимеров, Әлфиә Юлсурина кеүек артистар, Каруанһарай төркөмө моңло йырҙарын бүләк итәсәк. Джаз һөйөүселәргә таныш булған Олег Ҡасимов етәкселегендәге эстрада-джаз оркестрының сығышы ла концертҡа үҙенсәлекле бер тамаша өҫтәй. Барлыҡ йырҙарҙыңда тик тере тауыш менән генә йырланыуы айырыуса күңелде елкендереп ебәрә. Башҡорт эстрадаһының сағыу йондоҙҙары дәртле лә, моңло ла йырҙарын йыр-моң һөйөүселәргә һис йәлләмәй өләшәсәк был кистә. Рәхим итегеҙ!