11 апрелдә Республика Хәрби Дан музейында Фашист концлагерҙарынан тотҡондарҙы азат итеү көнөнә арналған сара үтте. «Иҫләүе лә ҡурҡыныс, онотоп та булмай...» исемле сараны музей хеҙмәткәре Пономарева Светлана Борисовна алып барҙы. Шул аяуһыҙ йылдарҙың шаһиттары, бала-саҡ йылдарын тотҡонда үткәргән Раиса Алексеевна Устинова һәм Виталя Винцентовна Мосолыгиналар менән осрашыуға Өфө механик-технология техникумы студенттары, Орджаникидзе районының 129-сы мәктәп уҡыусылары килгән ине. 

Башҡортостандың атҡаҙанған сәнғәт эшмәкәре, яҙыусы, Өфөнөң «Арлекин» хәйриә театры ойоштороусыһы һәм оҙаҡ йылдар художество етәксеһе булған Раиса Алексеевна Гитлерҙың «Шталаг N 352» концлагерына 5 йәшлек кенә сағында әсәһе, бер туған ағаһы һәм ауылдаштары менән эләгә.

Көнө-төнө әҙәм тәнен йотҡан крематорийҙарҙы, әсирҙәрҙе ғазаплау, улар менән йән өшөткөс тәжрибәләр үткәреү урынында булған, язалауҙарҙы үҙ күҙҙәре менән күргән, ул саҡта бала ғына көйө йәшәү өсөн көрәшкән инәйҙәр һөйләгәндә күҙҙәргә йәш тығыла.

Бындай саралар хәҙерге ваҡытта беҙҙҙең йәш быуын өсөн бик әһәмиәтле һәм кәрәкле. Һуғыш йылдарының бар ауырлығын, аслыҡ-яланғаслыҡты күргән оло быуын кешеләрен онотмаһаҡ ине.