28 февраль Х.Әхмәтов исемендәге Башҡорт дәүләт филармонияһының ҙур залында 112-се Башҡорт кавалерия дивизияһы командиры, генерал-майор М.М.Шайморатовтың батырҙарса һәләк булыуына 70 йыл тулыу айҡанлы, хәтер кисәһе үтте. Сараны БР Мәҙәниәт министрлығы ярҙамында 112-се Башҡорт кавалерия дивизияһы музейы, дивизияның ветерандар союзы һәм «Һуғыш хәрәкәте ветерандар союзы» ойошторҙо.
Хәтер кисәһендә генералдың яҡташтары, ветерандар сығыш яһаны. Һуғыш ветерандары республика комитеты рәйесе М.Муллағәләмов 112-се дивизияның тарихы менән таныштырҙы. БР-ҙың Архангель һәм Ҡырмыҫҡалы райондары военкомы Р.Н.Ғималовтың М.М.Шайморатовты милли батыр тип атауы бер кемде лә аптырауға һалманы.
Кисә лә патриотик йырҙар яңғыраны. Ә филармония фойеһында фотолар һәм архив документтарынан торған күргәҙмә эшләне.
Яҡташыбыҙға һуңлап булһа ла Герой исемен бирҙертеү өсөн халыҡ акцияһы – ҡултамғалар йыйыу бара, әлегә 450 мең ҡултамға йыйылған. Акция әле дауам итә, унда һеҙ ҙә ҡатнаша алаһығыҙ. Яҡташыбыҙға ғәҙел исем яулар өсөн, һеҙ ҙә үҙ өлөшөгөҙҙө индерегеҙ.
112-се Башҡорт кавалерия дивизияһы музейының телефоны: 8(347)2275202, 2274777 «Башҡортостандың мәҙәни донъяһы»
Фотогалереяға күсергә