“Башҡортостандың мәҙәни донъяһы” интернет-порталы ҡулланыусылары, тоғро уҡыусыларының рухи донъяһының бай булыуын теләй. Аҙнаның изге көнө, йома кисте матур итеп уҙғарыу өсөн, 30 октябрҙә баш ҡаланың мәҙәниәт усаҡтарында көтөлгән саралар хаҡындағы мәғлүмәттәрҙе тәҡдим итәбеҙ. М. Ғафури исемендәге БДАД театрында Х. Мөҙәрисованың “Бәхет хаҡы” спектакле тәҡдим ителә. Тормоштың ысын ҡиммәттәре хаҡындағы драмала төп ролдәрҙе театрҙың өлкән быуын артистары башҡара. Тамаша театрҙың ҙур сәхнәһендә, 19.00 сәғәттә башлана. БД опера һәм балет театрында Ш. Перро әкиәте буйынса П. Чайковский яҙған “Йоҡоға талған һылыу” балеты көтөлә. Балет, шулай уҡ, төрлө быуын тамашасыларына ла тура килә. Уны театрҙың ҙур зал сәхнәһендә, 19.00 сәғәттә ҡарарға мөмкин. Рус дәүләт академия драма театрын һайлаусылар А. Островскийҙың “Шәп урында”, тип аталған күңелле спектакле, комедияны ҡарай ала. Уны ҡарарға теләгәндәр театрҙың ҙур залына, 19.00 cәғәттә рәхим итһен.