Башҡортостанда төрки телле шиғриәтте тәржемә итеүселәрҙең II халыҡ-ара конкурсына ижади эштәр 1 июлгә тиклем ҡабул ителәсәк. Башҡорт әҙәбиәтен донъя кимәленә сығарыуға «Аҡ торна» халыҡ-ара төрки шиғриәтте тәржемә итеүселәр конкурсы ҙур мөмкинлек бирәсәк, тигән фекерҙә бәйгене ойоштороусылар. Был ижади майҙанда, башҡорт йәки башҡа ҡәрҙәш халыҡтарҙың телдәрендә яҙылған әҫәрҙәр яңы һулыш ала, ти улар.

«Аҡ торна» конкурсы Башҡортостандың баш ҡалаһында тәүге тапҡыр 2011 йылда үткәрелгәйне. Уникаль мәҙәни сарала Рәсәй төбәктәренән, шулай уҡ яҡын һәм алыҫ сит илдәрҙән бер нисә тиҫтә автор ҡатнашты.

Быйыл бәйге ҡағиҙәләренә бер аҙ үҙгәрештәр индерелгән. «Фәлсәфә лирикаһы», «Граждандар лирикаһы» һәм «Мөхәббәт лирикаһы» тигән өс номинация булдырылған. Конкурстың шарттары менән www.aktorna.com адресы буйынса танышырға мөмкин.