Республиканың сәнғәт коллективтары быйылғы ижад миҙгелен төрки телле театрҙарҙың V Халыҡ-ара «Туғанлыҡ» фестивале менән башланы. 6 сентябрҙән 13 сентябргә тиклем уҙасаҡ ижади сарала төрки телле илдәрҙән һәм республикаларҙан 17 коллектив ҡатнаша. Ҡағиҙә буйынса, һәр төбәк һәм ил конкурсҡа 1 спектакль сығара. Башҡортостан данын Мәжит Ғафури исемендәге Башҡорт дәүләт академия драма театры яҡлай. Коллектив театр режиссеры Айрат Абушахманов ҡуйылышында Мостай Кәримдең «Ай тотолған төндә» трагедияһы буйынса спектакль тәҡдим итә.

«Ай тотолған төндә» донъяның ниндәй генә сәхнәһендә ҡуйылмаған. Уны һәр театр төп сәхнә әҫәре итеп һанай. Башҡорт халҡының рухи ҡиммәттәре, йолалары аша күрһәтелгән драма халыҡ аҡылы, поэтик һәм эстетик зауыҡ менән һуғарылған. Шәхес һәм йәмғиәт, көс менән иреклек бер бөтөн булып тоташа. Заманса йүнәлештә сәхнәләштерелгән трагедияла ижади коллективтың дүртенсе быуын актерҙары уйнай.

«Ай тотолған төндә» трагедияһының төп героиняһы- ҡайғыға сумған, утыҙ йыл буйы тәрән үкенестә йәшәгән әсә. Образға көслө рухлы актриса ғына дәғүә итә ала. Был юлы Тәңкәбикә ролен Башҡортостандың атҡаҙанған артисткаһы Сара Буранбаева башҡара.

Шуны ла әйтергә кәрәк, 6 йыл элек уҙған һуңғы Туғанлыҡ фестивалендә Айрат Әбушахмановтың «Кәкүк ояһы» спектакле Гран-при яулағайны.