Башҡортостан делегацияһының Эстон Республикаһына сәфәре ошондай девиз аҫтында үтте. Был сәфәр республика министрлыҡтары, ЮНЕСКО эштәре буйынса комитеты һәм Палдиски ҡалаһының хөкүмәте һәм Балтик буйы башҡорттарының йәмәғәт ойошмалары тарафынан ойошторолдо.
Сәфәрҙең төп маҡсаты егерме биш йыл Балтик Порты, йәғни хәҙерге Палдиски ҡалаһында каторгала булған Салауат Юлаев исемен мәңгеләштереү булды. Башҡортостан һәм Палдиски вәкилдәре ҡалала Салауат Юлаев исемендәге парк һәм музей асыу тураһында фекер алышты.
Эстон республикаһының мәҙәниәт министрлығында башҡорт һәм эстон театрҙарының гастролдәрен ойоштороу, музейҙар араһында хеҙмәттәшлекте яйға һалыу ҡаралды.
Палдиски ҡалаһында Балтик республикалары һәм Башҡортостан эшҡыуарҙарының бизнес-форумы үтте. Сарала ҡатнашыусылар киләсәктә үҙ-ара хеҙмәттәшлек юлдарын да ҡараны. Форумдан һуң сарала ҡатнашыусылар ҡаланың иҡдисады менән яҡыныраҡ танышыу маҡсатында, Палдискиҙа урынлашҡан ете предприятиела булды. Сәфәр сиктәрендә Палдиски ҡалаһы көнө лә үтте. Байрам концертында эстон эстрада йондоҙҙарынан тыш, Башҡортостандандың «Далан» төркөмө сығыш яһаны. Башҡорт һабантуйы нигеҙендә уҙған сара Балтик буйында йәшәүсе барлыҡ милләттәштәребеҙҙе йыйҙы. Башҡортостан Республикаһының рәсми делегацияһы сәфәре юғары кимәлдә үтте.
Был сәфәр күберәк танышыу маҡсатында булды. Әммә ике яҡ та киләсәктә хеҙмәттәшлекте нығытырға ниәтләнә. Палдиски ҡалаһы вәкилдәре Башҡортостанға 11октябрҙә килергә теләк белдерҙе. Сығанаҡ: Башҡортостан юлдаш телевидениеһы