Йәй миҙгелен ҡаршылап, Мәжит Ғафури исемендәге Башҡорт дәүләт академия драма театры үҙ тамашасыһын йәнә бер «күстәнәс» менән һөйөндөрмәксе: әлеге ваҡытта академтеатр Наил Ғәйетбайҙың «Бер мәл санаторийҙа…» пьесаһы буйынса өр-яңы комедия әҙерләү өҫтөндә эшләй. Режиссеры – Илдар Вәлиев.

Республиканың төрлө төбәктәренән йыйылған элекке хеҙмәт алдынғылары: ябай эшселәр, интеллигенция вәкилдәре ял итергә санаторийға килә. Әммә, ни ғәләмәт: беренсе көндән үк аңлашмаусанлыҡтар, сыуалыштар башлана. Етмәһә, төрлө райондарҙан йыйылыуға ҡарамаҫтан, геройҙарҙың яҙмышы бер-береһенә бәйле, хатта ҡайһылары ҡасандыр бер-береһен бик яҡын күргән кешеләр булып сығалар…

Спектаклгә, дөйөм алғанда, театрҙың оло быуын артистары йәлеп ителгән. Тәнзилә Хисамова, Нурия Ирсаева, Миңзәлә Хәйруллина, Хәмит Яруллин, Илдар Сәйетов, Суфия Сәфиуллина, Илсөйәр Ғәзетдинова, Рәмзиә Хисамова, Әхәт Хөсәйенов, Заһир Вәлитов, Рауис Заһитов һәм башҡа яратҡан артистарығыҙ әҙерләгән яңы спектакль йәй алдынан барығыҙға ла яҡшы ял, күтәренке кәйеф бүләк итер тигән өмөттәбеҙ!

Премьера көнө - 7 һәм 8 июнь!

Әйткәндәй, 8 июнь театр 92-се ижад миҙгелен ябасаҡ һәм ошо уңайҙан спектакль алдынан 18.00 сәғәттә театр алдындағы майҙанда ҙур байрам концерты көтөлә.

Автор: Рита Хәсәнова

Сығанаҡ: «Тамаша» журналы