Акцияны драматург, БР Яҙыусылар союзы председателе Наил Ғәйетбаев асып ебәргән ине.

23 июндә Рәсәйҙең һәм Башҡортостандың халыҡ артисы, Өфө сәнғәт академияһы профессоры Таңсулпан Бабичева эстафетаны М. Ғафури исемендәге Мәҙәниәт фонды советы рәйесе Люция Камаеваға һәм билдәле йырсы Радик Динәхмәтовҡа тапшырҙы. 

─ Әҙәбиәт йылында Шәйехзада Бабичтың тыуыуына 120 йыл тулды һәм йыл башында «Весенняя песнь» исемле китабы баҫылды, шулай уҡ уҙған йылда билдәле шәхестең ижадына арнап «Арҡадаш» әҙәби конкурсы ойошторолдо. Шуныһы ҡыуаныслы: был проектта төрлө йәштәге кешеләр ҡатнашырға теләк белдерҙе. Улар араһында мәктәп уҡыусылары, юғары уҡыу йорттары студенттары, актерҙар һәм ижади коллективтар бар. Күптән түгел «Арҡадаш» хәйриә фонды эшләй башланы. Был эшебеҙҙә беҙ халҡыбыҙҙың арҙаҡлы шәхестәрен, уларҙың тормошон, милли мәҙәниәтте, тарихты йәш быуынға еткереүҙе маҡсат итеп ҡуйҙыҡ. Һәм бөгөн халҡыбыҙҙың күренекле шәхесе Ш. Бабичтың китабын мин Дәүләкән ҡалаһының башҡорт гимназияһына, Сибай университетына, Дүртөйлө районының Әсән ауылындағы Ш. Бабич исемендәге музейына, Йылайыр районы Йылайыр ауылында урынлашҡан Ш. Бабич исемендәге башҡорт гимназияһына һәм “Арҡадаш” конкурсының еңеүселәренә тапшырам, ─ тине Таңсулпан Даһи ҡыҙы. 

Эстафетаны ҡабул иткән М. Ғафури исемендәге Мәҙәниәт фонды советы рәйесе Люция Камаева Мәжит Ғафури тураһында ҡыҙыҡлы мәғлүмәттәр менән уртаҡлашты һәм фонд эшмәкәрлеге менән таныштырҙы. Йырсы Радик Динәхмәтовтың Ш. Бабич һүҙҙәренә башҡарыуында йыр һәммәбеҙҙең күңеленә хуш килде.

Милли китапты пропагандалау, йәш быуынды тәрбиәләү, китап уҡыуға иғтибарҙы йәлеп итеү маҡсатында башланғыс алған акция дауам итә. Әйткәндәй, йыл буйына барасаҡ акцияла һәр кем ҡатнашырға теләк белдерә ала.

Сығанаҡ: нәшриәт сайтынан алынды.