Китапты 2013 йылдың сентябрь айында үтәсәк Халыҡ-ара Аксаков көндәрендә сығарырға планлаштыралар. Өфө ҡала советы ошо тәҡдим менән сыҡты.

Аксаков байрамы республика тормошонда лайыҡлы урын алған сағыу тамашаларҙың береһе. Быйыл ул 23 тапҡыр үткәреләсәк. Ошо йылдар ағымында был байрам бик күп йолалар менән байытылды. Мәҫәлән, 1992 йылда ҡала советы тарафынан юғары һәм урта махсус уҡыу йорттары студенттары араһында Аксаков стипендияһы булдырылды, ә 2006 йылда ул премия дәрәжәһенә күтәрелде. 1996 йылда республика хөкүмәте тарафынан Сергей Аксаков исемендәге әҙәби премия булдырылды. Ул әҙәбиәт үҫешенә, уның рухи ҡиммәттәрен һаҡлауға тос өлөш индергән әҙәбиәт һәм сәнғәт әһелдәренә бирелә. Василий Белов, Валентин Распутин, Валерий Ганичев кеүек билдәле яҙыусылар юғарыла әйтелгән премия лауреаттары.

2007 йылда байрамға тағы ла матур йола өҫтәлде – студенттар балы. Ул Өфө дәүләт сәнғәт академияһында, Ҡала мәҙәниәт һарайында һәм Башҡорт дәүләт опера һәм балет театрында үткән байрам, 2012 йылда театр стеналарынан ҡала майҙанына сыҡты.

Бөтә ошо ҡыҙыҡлы материалдар, Аксаков исеме менән бәйле иҫтәлекле урындар китапҡа тупланасаҡ. Өфө Ҡала хакимиәте советы студенттарҙы, тыуған яҡты өйрәнеүселәрҙе, тарихсыларҙы китап өсөн материал тупларға ярҙамға саҡыра.

Белешмәләр өсөн телефон 279–05–07.