Археология – үткәнебеҙҙең ваҡыт шаршауын асҡан, тарихыбыҙ серҙәре менән таныштырған, ҡайһы саҡта иҫ китәрлек асыштар яһаған фән. Археологтар булмаһа, Боронғо Рим, Греция, Һиндостан һәм башҡа бихисап дәүләттәр тураһында донъяла бөгөн белерҙәр инеме икән? Сер түгел, һуңғы мәлдә беҙҙең Башҡортостанда ла ысын мәғәнәһендә тарихи асыштар яһала. Өфө II ҡаласығында табылған ҡомартҡылар ҙа шулар иҫәбендә. Уларға ярашлы, Өфө – Рәсәйҙәге иң боронғо ҡалаларҙың береһе һәм уға нигеҙ һалыныуға кәмендә 1500 йыл.

Археологтар көнө календарҙа күптән түгел генә барлыҡҡа килде. Башҡортостан археологтары бөгөн ҙур бер профессиональ коллективҡа ойошҡан. Башҡорт дәүләт университетында Археология, боронғо һәм урта быуат тарихы кафедраһы бар. Шулай уҡ Башҡорт дәүләт педагогия университетының археология коллективы, Рәсәй Фәндәр Академияһының Тарих, тел һәм әҙәбиәт институтының археология бүлеге һөҙөмтәле эшләй. Был белгестәрҙе Бөрөлә, Стәрлетамаҡта, Сибайҙа әҙерләйҙәр. 

Археологтарҙы һөнәри байрамы менән ихлас ҡотлайбыҙ. Улар тикшеренеүҙәрҙен артабан да уңышлы дауам итһен, ҡомартҡыларыбыҙҙы һаҡлап ҡалыу өҫтөндә арымай-талмай эшләһен!