25 апрель Өфөгә Минск–Өфө йүнәлешендәге «Арт-транзит» паровозы килде. Тантаналы осрашыу Ә.-З.Вәлиди исемендәге Милли китапханала үтте. Был паровоз Белоруссия, Һиндостан, Польша, Сербия һәм Рәсәйҙең йәш рәссамдарының эштәрен алып килде.

Осрашыуҙы асып проект кураторы Глеб Евгеньевич Голубев күргәҙмәгә килеүселәрҙе «Арт-танзит»тың барлыҡҡа килеү тарихы менән таныштырҙы. Уның әйтеүенсә, маҡсат төрлө мәктәптәрҙең эштәре менән танышыу һәм иң мөһиме тәжрибә менән уртаҡлашыу. Рәссам Салауат Ғиләжетдинов та проекттың кәрәкле булыуын һыҙыҡ өҫтөнә алды.

Ысынлап та, «Балалар баҫма графикаһы» күргәҙмәһендә иң яҡшы эштәр ҡуйылған, улар барыһы ла Минск ҡалаһында үткән Халыҡ-ара һынлы сәнғәт һәм графика конкурсында призлы урындар яулаған. Уҡыусылар эштәрен төрлө техникала эшләгән: линогравюра, төҫлө линогравюра, ҡатырғала төшөрөлгән гравюра, офорт – барыһы ла үҙенсәлекле һәм мәғәнәле.

Күргәҙмә 1 июнгә тиклем дауам итә. Уны үткәреүҙә Мәҙәниәт министрлығы, Ә.-З.Вәлиди исемендәге Милли китапхана, «Художка» һынлы сәнғәт мәктәбе ҙур көс һалған.