Бөгөн, 9 октябрҙә Башҡортостандың баш ҡалаһы Өфөгә Силәбе өлкәһе башҡорттары Ҡоролтайы башҡарма комитеты председателе урынбаҫары Флүзә Ғайсина һәм СБЙИ рәйесе Ильфир Илбаҡтин етәкселегендә Силәбе өлкәһе башҡорт йәштәре делегацияһы килде. Алдан һөйләшелгәнсә, “Ашҡаҙар” радиоһы уларға БЮТ-ның “ Cәләм“, “Тамыр” балалар телеканалы, “Ашҡаҙар” радиоһы программаларында ҡатнашыу мөмкинлеге булдырҙы, телевидение һәм радио кухняһы менән таныштырҙы. Ваҡиғаның икенсе өлөшө телеүҙәктең конференция залында республиканың арҙаҡалы шәхестәре, билдәле шағир Хәсән Назар, ғалим һәм педагог, шағир Фәнил Күзбәков, яҙыусы һәм драматург Таңсулпан Ғарипова, яҙыусы Лира Яҡшыбаева менән осрашыу рәүешендә дауам итте. Әҙиптәр рух, тел, Силәбе башҡорттарының тамырҙары хаҡында һөйләне, үҙҙәренең ижады менән таныштырҙы, алдағы көндәрҙә Силәбе ерендә осрашыу хаҡында эшлекле һорауҙарҙы тикшерҙе, ә йәштәр уларға үҙҙәрен ҡыҙыҡһындырған һорауҙарҙы бирҙе. Артабан Силәбенән килеүсе егеттәр һәм ҡыҙҙарҙың сәйәхәте баш ҡала мәҙәниәт усаҡтарында дауам итәсәк, программала ҡала буйлап эксурсия, театр, музейҙарға барыу ҡаралған.