22 май көнендә М.Ғафури исемендәге Башҡорт дәүләт академия театрының бәләкәй залында Валентин Красногоровтың пьесаһы буйынса әҙерләнгән «Аяуһыҙ һабаҡ» (“EXPERIMENT”) спектакле үтә. Режиссеры – Илсур Ҡаҙаҡбаев, рәссам – Альберт Нестеров, музыкаль яҡтан биҙәүсе – Илшат Яхин, урыҫ теленән башҡортсаға Луиза Айытбаева тәржемәһе.

В.Красногоровтың драмаһы ҡанһыҙлыҡтың социаль һәм психологик тамырҙары, кешелеклелек сифаттары хаҡында. Пьесаның нигеҙен ваҡытында халыҡ араһында ҙур резонанс тыуҙырған психологик эксперимент тәшкил итә: ике студент профессор ҡулы аҫтында фәнни маҡсаттарҙа бер ҡатынды язалай. Бөгөнгө көндә, кешелеклелек һәм бер-береңә хөрмәт менән ҡарай белеү кеүек сифаттар ҡатмарлашҡан осорҙа, был тема бигерәк тә мөһим яңғыраш ала.

Спектаклдә Профессор ролен Башҡортостандың атҡаҙанған артисы Ирек Булатов уйнаһа, Тимур – Урал Әминев һәм Артур Кәбиров, Лилиә – Лилиә Ғалина һәм Зилиә Хәлилова, Рената ролендә – Ирада Фазлаева менән Айһылыу Йомағолова.

Автор: Рита Хәсәнова

Сығанаҡ: "Шоңҡар" журналы