Март айында Х.Әхмәтов исемендәге Башҡорт дәүләт филармонияһында матур тамашалар көтөлә: Халыҡ-ара джаз фестивале, БР-ҙың атҡаҙанған артисы Сәйҙә Ильясованың концерттары, РСФСР-ҙың һәм БАССР-ҙың халыҡ артисы Радик Гәрәевтың хәтер кисәһе. БР-ҙың атҡаҙанған артисы Азат Биксуриндың 16 мартта үтәсәк «Яңы дуҫтар »концерт программаһы айырым иғтибарға лайыҡ.

Азат Биксурин – профессиональ ҡурайсы, виртуоз, республика һәм халыҡ-ара конкурстар лауреаты, башҡорт сәнғәтендә сағыу музыканттарҙың береһе. Ҡурайҙа милли көйҙәр генә уйнап ҡалмай, классик, сит ил эстрадаһы көйҙәрен дә һыҙҙырта.

Музыка өлкәһендә яңы алымдар эҙләп, ул этник-фьюжн «Сураман» төркөмөн ойоштора. Уның составында Артур Байрамғалин (гитара), Александр Карташов (бас-гитара), Андрий Филиппов (клавиша), Владимир Юдин (перкуссия), Шәфкәт Әүәзов (һуҡма ҡорамалдар).

Башинформ мәғлүмәт агентлығы материалынан әҙерләнде