18 сентябрҙән 4 октябргә тиклем «Мираҫ» галереяһында Васил Ханнановтың күргәҙмәһе үтәсәк. Рәссам тамашасы иғтибарына «Азия» тип аталған ижади проект тәҡдим итә. 

Уның төп үҙенсәлеге булып элек һәр бер йортта булған көнсығыш балаҫтары тора. Балаҫтар өйгә биҙәк булып торған, йәм һәм йылылыҡ биргән. Әммә бөгөнгө көндә мода үҙгәреүе арҡаһында, уларҙың баһаһы төштө. Шуға күрә лә ижадсы уларға яңы һулыш өрөргә ҡарар итә. Интерьер әйбере булып хеҙмәт иткән балаҫтар сәнғәт өлгөһөнә әйләнә. Күргәҙмәлә төп урынды Сергей Есенин шиғырҙарына нигеҙләнеп эшләнгән «Фарсы нигеҙҙәре» серияһына ҡараған эштәр биләйәсәк. Шулай уҡ ижадсы әйтеүенсә, был проектҡа тотоноу идеяһы 2013 йылдың октябрь айында Иранға барып ҡайтҡандан һуң тыуа.