Кисә, М. Кәрим исемендәге Милли йәштәр театрында “Аҡ тирмә” милли мәҙәниәт йәмәғәт ойошмаһы һәм БР Яҙыусылар берлеге “Бал ҡортондай ынйы йыямын”, тип исемләнгән шиғриәт кисәһе ойошторҙо. Сара шуныһы менән ҡыҙыҡ булды, бында Әҙәбиәт йылына арналған марафонда ҡатнашҡан йәш шағирҙар ҡатнашты. Кисәнең сценарийы бик матур уйланылғайны. Сәхнәлә барған ваҡиғалар,залдың тулы булмауына ҡарамаҫтан,бик йылы мөхит булдырҙы. З. Исмәғлиев исемендәге ӨДСА студенттары һәм йәш шағирҙар бер сәхнәлә сығыш яһаны. Студенттар ҡуйылған тауыш менән шиғыр башлаһа, артабан уларҙы үҙҙәренең шәхси тупланмаһындағы шиғыр менән автор дауам итте. Был сараны артабан инде БР Яҙыусылар берлеге ағзалары, танылған шағир-шағирәләребеҙ Рауил Бикбаев, Зөлфиә Ханнанова, Лариса Абдуллина, Гөлнара Хәлфетдинова дауам итте. Олкән быуын шағирҙары башҡорт шиғриәтенең киләсәге булыуына һөйөнөсөн белдерҙе. Улар һәр береһе башлап ҡәләм тирбәлтеүселәргә тәбрик һүҙҙәре әйтте һәм үҙҙәренең рухлы шиғырҙарын яңғыратты. Сығыштар араһында тамашасылар йыр һәм бейеү номерҙарын ҡарап ял итте.