Башҡортостанда төрки телле шиғриәтте тәржемә итеүселәрҙең II халыҡ-ара конкурсына ижади эштәр ҡабул итеү 1 сентябргә тиклем оҙайтыла.
«Аҡ торна» конкурсы Башҡортостандың баш ҡалаһында тәүге тапҡыр 2011 йылда үткәрелгәйне. Уникаль мәҙәни сарала Рәсәй төбәктәренән, шулай уҡ яҡын һәм алыҫ сит илдәрҙән бер нисә тиҫтә автор ҡатнашты. Башҡорт әҙәбиәтен донъя кимәленә сығарыуға «Аҡ торна» халыҡ-ара төрки шиғриәтте тәржемә итеүселәр конкурсы ҙур мөмкинлек бирәсәк, тигән фекерҙә бәйгене ойоштороусылар. Был ижади майҙанда, башҡорт йәки башҡа ҡәрҙәш халыҡтарҙың телдәрендә яҙылған әҫәрҙәр яңы һулыш ала, ти улар.
Ойоштороу комитетынан хәбәр итеүҙәренсә, әле Мәскәү, Өфө, Ҡаҙан, Әстрәхан, Силәбе, Барнаул, Горно-Алтайск, Новороссийск һ.б. ҡалаларҙан, шулай уҡ Ҡаҙаҡстан, Украина, Әзербайджан, Үзбәкстандан 200-ҙән ашыу эш ҡабул ителгән.
Еңеүселәрҙе бүләкләү тантанаһы 2012 йылдың октябренең икенсе яртыһына тәғәйенләнгән. Ә 7 сентябрҙә халыҡ-ара ТӨРКСОЙ ойошмаһына ингән илдәрҙең мәҙәниәт министрҙарының даими Советының XXX ултырышы һәм «Туғанлыҡ» V халыҡ-ара төрки телле театрҙар фестивале мәлендә проекттың киңәйтелгән презентацияһын үткәреү күҙаллана.
Еңеүселәр «Фәлсәфә лирикаһы», «Граждандар лирикаһы» һәм «Мөхәббәт лирикаһы» тигән өс номинацияла билдәләнәсәк. Конкурстың шарттары менән www.aktorna.com адресы буйынса танышырға мөмкин.