Музей — халыҡтарҙың үткәнен бөгөнгө тормошо менән тоташтырыу үҙәге. 

Тарихһыҙ киләсәк юҡ. Һәр милләт үҙенең үткәненә ҙур иғтибар бирә, уны өйрәнә, тарихи дәлилдәргә таянып, киләсәген күҙаллай. Иң мөһиме — музей йәш быуында үткәнгә ихтирам тәрбиәләй. Шуның өсөн киләсәген ҡайғыртҡан һәр милләт музейҙар төҙөй, яңынан-яңы тарихи материал менән тулыландырып байыта.

Музейҙар көнө айҡанлы Республиканың барлыҡ музейҙарында төрлө саралар ойошторола. Мәҫәлән, Башҡортостан Милли музейында «Алтын хазина» тигән күргәҙмә асыла, Михаил Нестеров исемендәге Башҡорт дәүләт художество музейҙында Наил Байбуриндың «Артефакттар» тигән экспозициялары эшләй. Иртәгә бөтә ил буйлап «Музейҙар төнө» мәҙәни акцияһы үтәсәк. Акцияла Башҡортостан музейҙары ла ҡатнаша. Улар киске 6-нан иртәнге сәғәт 4-кә тиклем эшләйәсәк. «Музейҙар төнөн»дә теләгән һәр кеше учреждениеға бушлай инә ала.

«Башҡортостандың мәҙәни донъяһы» порталы