27 май календарҙа ил президенты указы менән Бөтә Рәсәй китапханалар көнө булараҡ билдәләнгән. 1795 йылдың ошо көнөндә Император йәмәғәт китапханаһы асыла, бөгөн ул Рәсәй милли китапханаһы исемен йөрөтә.

Республикала 1 мең 700-гә яҡын китапхана иҫәпләнә. Уларҙа 32 миллион төр документ һаҡлана. 1990 йыл менән сағыштырғанда, китапханалар һаны 9,6 процентҡа кәмегән, уның ҡарауы фонд 7,8 процентҡа, йәғни 2 миллион 300 мең документҡа артҡан. Бөгөн китапханаларҙың маҡсаты - ҡулланыусыларҙың мәғлүмәт һәм мәҙәни ихтыяжын тәьмин итеү. Китап уҡыусыларға уңайлы шарттар тыуҙырыу өсөн электрон каталогтар һәм белешмә-библиография мәғлүмәт базалары булдырыла. Республикала 700-ҙән ашыу китапхана компьютерҙар менән йыһазландырылған, шуларҙың 600-ләбе интернетҡа тоташтырылған. Китапхана фондтарында Рәсәй халыҡтары телдәрендә нәшер ителгән 5 миллион 800 мең дана китап һаҡлана.